چین اور کرغزستان کے درمیان تعاون تیزی سے فروغ پا رہا ہے ، چینی وزیر اعظم

ہانگ جو :چین کے وزیر اعظم لی چھیانگ سے چین کے شہر ہانگ جو میں کرغزستان کے وزیر اعظم ادیل بیک کاسی مالئیف نے ملاقات کی، جو پانچویں عالمی ڈیجیٹل تجارتی نمائش میں شرکت کے لیے چین میں موجود ہیں۔جمعرات کے روز لی چھیانگ نے کہا کہ حالیہ برسوں میں دونوں ممالک کے سربراہانِ مملکت کی تزویراتی رہنمائی میں چین اور کرغزستان کے درمیان تعاون تیزی سے فروغ پاتے ہوئے ایک سنہری دور” میں داخل ہو گیا ہے۔ چین، کرغزستان کے ساتھ دونوں سربراہانِ مملکت کے دوروں کے نتائج پر عمل درآمد کرتے ہوئے چین-کرغزستان ہم نصیب معاشرے کی تعمیر کو آگے بڑھانا چاہتا ہے تاکہ اس کے ثمرات دونوں ممالک کے عوام تک مزید مؤثر انداز میں پہنچ سکیں۔لی چھیانگ نے کہا کہ چین، کرغزستان کے ساتھ اعلیٰ معیار کے ساتھ “دی بیلٹ اینڈ روڈ” کی مشترکہ تعمیر جاری رکھنے، چین-کرغزستان-ازبکستان ریلوے اور سرحدی گزرگاہوں کی جدید کاری سمیت دیگر منصوبوں کی تعمیر کو آگے بڑھانے کے لیے تیار ہے۔ چین، کرغزستان سے مزید معیاری مصنوعات درآمد کرنے اور باصلاحیت چینی کمپنیوں کو کرغزستان میں سرمایہ کاری کی ترغیب دینے کے لیے بھی تیار ہے۔ انہوں نے امید ظاہر کی کہ دونوں فریق جلد از جلد اعلیٰ معیار کے خدماتی تجارت اور سرمایہ کاری کے معاہدے پر اتفاق کر لیں گے۔ کرغزستان کے وزیر اعظم نے کہا کہ کرغزستان ایک چین کے اصول پر پختگی سے قائم ہے اور چین کے ساتھ مل کر چین-کرغزستان-ازبکستان ریلوے کی تعمیر کو فعال طور پر آگے بڑھانے اور دونوں ممالک کے عوام کے لیے مزید فوائد پیدا کرنے کا خواہاں ہے۔ کرغزستان صدر شی جن پھنگ کی جانب سے پیش کردہ چار گلوبل انیشی ایٹوز کی بھرپور حمایت کرتا ہے اور اقوام متحدہ، شنگھائی تعاون تنظیم اور چین-وسطی ایشیا تعاون میکانزم سمیت کثیرالجہتی پلیٹ فارمز پر چین کے ساتھ قریبی تعاون کرتے ہوئے دنیا کے استحکام اور خوشحالی کے فروغ کے لیے مشترکہ کوششیں کرنے کا خواہاں ہے۔