سنکیانگ میں اسٹاربکس کے نئے اسٹورز پر امریکی ادارے کا الزام سراسر جھوٹ ہے، چینی وزارت خارجہ

امریکی ایوانِ نمائندگان کی چین سے متعلق خصوصی کمیٹی نے چین کے سنکیانگ ویغور خود اختیار علاقے میں اسٹاربکس کی جانب سے نئے اسٹورز کھولنے کو “اخلاقی تباہی” قرار دیا ہے۔ اس حوالے سے چین کی وزارت خارجہ کے ترجمان گو جیاکھون نے ایک سوال کا جواب دیتے ہوئے کہا کہ سنکیانگ میں نام نہاد “نسل کشی” کا الزام سراسر جھوٹ ہے۔ امریکہ کا متعلقہ ادارہ سیاسی مقاصد کے لیے بے بنیاد الزامات عائد کرتے ہوئے چین کو بدنام کرتا آیا ہے، اس لیے اس کے دعووں پر کوئی اعتبار نہیں کیا جا سکتا۔
چینی ترجمان نے کہا کہ اس وقت سنکیانگ میں معاشرتی استحکام، اقتصادی ترقی، قومی یکجہتی اور مذہبی ہم آہنگی برقرار ہے۔ چین اعلیٰ سطح کے کھلے پن کو وسعت دینے اور غیر ملکی کمپنیوں کو چین میں سرمایہ کاری اور کاروبار کے مزید مواقع فراہم کرنے کے لیے مسلسل کوششیں جاری رکھے گا۔