دنیا بھر میں خواتین کی تعلیم کے شعبے میں قابلِ اطمینان پیش رفت ہوئی ہے، اہلیہ چینی صدر

فرانس کے دارالحکومت پیرس میں 2026 یونیسکو پرائز فار گرلز اینڈ وویمن ایجوکیشن ایوارڈ تقریب منعقد ہوئی۔ چینی صدر شی جن پھنگ کی اہلیہ اور یونیسکو کی لڑکیوں اور خواتین کی تعلیم کے حوالے سے خصوصی سفیر پھنگ لی یوان نے تقریب سے ورچوئل خطاب کیا۔پھنگ لی یوان نے کہا کہ گزشتہ چند برسوں کے دوران یونیسکو کی بھرپور سرپرستی اور عالمی برادری کی مشترکہ کوششوں سے دنیا بھر میں لڑکیوں اور خواتین کی تعلیم کے شعبے میں قابلِ اطمینان پیش رفت ہوئی ہے۔انہوں نے کہا کہ چین ہمیشہ سے لڑکیوں اور خواتین کی تعلیم کو بہت اہمیت دیتا آیا ہے اور یونیسکو سمیت متعلقہ فریقوں کے ساتھ فعال طور پر عملی تعاون کر رہا ہے، جس سے متعدد ممالک کی بڑی تعداد میں خواتین مستفید ہوئی ہیں۔ حالیہ برسوں میں چین نے اے آئی ٹیکنالوجی کے ذریعے تعلیم کی اعلیٰ معیاری ترقی کو فروغ دیا ہے، جس سے تعلیم میں صنفی مساوات اور خواتین کی ہمہ جہت ترقی کو مؤثر طور پر آگے بڑھانے میں مدد ملی ہے۔ اس سلسلے میں چین نے گلوبل ساؤتھ ممالک کے لیے قابلِ تقلید مفید تجربات بھی فراہم کیے ہیں۔پھنگ لی یوان نے کہا کہ وہ تمام فریقوں کے ساتھ مل کر لڑکیوں اور خواتین کی تعلیم کے شعبے میں مزید پیش رفت کے لیے کوششیں جاری رکھنے اور زیادہ سے زیادہ خواتین کے روشن مستقبل کی تعمیر میں اپنا کردار ادا کرنے کی خواہش مند ہیں۔