اسلام آباد: صدر آصف علی زرداری نے کہا ہے کہ پاکستان امن اور پائیدار ترقی کے لیے تمام ممالک کے ساتھ مل کر کام کرنے کے لیے تیار ہے۔ اسلام آباد میں ‘قیادت اور استحکام’ کے موضوع پر منعقدہ بین الاقوامی ورکشاپ کے شرکاء سے خطاب کرتے ہوئے، صدر نے اس امید کا اظہار کیا کہ ورکشاپ میں ہونے والی فکر انگیز گفتگو سے معاشرے کے وسیع طبقات مستفید ہوں گے۔
صدر آصف علی زرداری نے کہا کہ بہترین قیادت اور استحکام وہ اہم ستون ہیں جن پر قومیں اور ادارے قائم ہوتے ہیں۔ انہوں نے کہا کہ آج دنیا کو تیزی سے بدلتی ہوئی جیو پولیٹیکل (جغرافیائی سیاسی) تبدیلیوں، ابھرتے ہوئے سیکیورٹی خطرات اور طرزِ حکمرانی میں ٹیکنالوجی کے بڑھتے ہوئے کردار کا سامنا ہے۔ صدر نے مزید کہا کہ موسمیاتی چیلنجز، وسائل کی کمی اور غلط معلومات (Misinformation) جیسے مسائل کے لیے مشترکہ حل کی ضرورت ہے۔
صدر آصف علی زرداری کا کہنا تھا کہ اس طرح کی ورکشاپس پالیسی سازوں، سفارت کاروں، دفاع، تعلیم اور نجی شعبے کے حکام اور ماہرین کو ایک جگہ بیٹھنے اور اجتماعی سطح پر تبادلہ خیال کرنے کے مواقع فراہم کرتی ہیں۔ صدر نے شرکاء پر زور دیا کہ وہ ان مباحثوں کو عملی دنیا کے مسائل کے حل میں تبدیل کریں اور تقسیم کے بجائے مکالمے، اور تصادم کے بجائے تعاون کو ترجیح دیں۔
Leave feedback about this